കർണാടക സംസ്ഥാനത്തിന്റെ തലസ്ഥാനമാണ് ബാംഗ്ലൂർ അഥവാ ബെംഗളൂരു. ഇന്ത്യയിലെ മൂന്നാമത്തെ ജനനിബിഡമായ നഗരവും അഞ്ചു വലിയ തലസ്ഥാന നഗരങ്ങളിലുമൊന്നായ ഇവിടെ ഏകദേശം 65 ലക്ഷം പേർ വസിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. ഇന്ത്യയിലെ ഒരു വലിയ സാമ്പത്തിക സ്രോതസ്സായി മാറിയ ബെംഗളൂരു ‘ഇന്ത്യയുടെ സിലിക്കൺ വാലി’ എന്നാണു അറിയപ്പെടുന്നത്. വൻ കിട വ്യവസായങ്ങളുടെയും, സോഫ്റ്റ്‌വെയർ, എയ്റോസ്പേസ്, വാർത്താവിനിമയ സം‌വിധാനങ്ങൾ തുടങ്ങിയ മേഖലകളിൽ പ്രവർത്തിക്കുന്ന കമ്പനികളുടെയും ആസ്ഥാന നഗരം കൂടിയായ ബെംഗളൂരുവിൽ ലഭിക്കാത്തത് ഒന്നുമില്ല എന്നു വേണം പറയുവാൻ. വർദ്ധിച്ചു വരുന്ന ഇന്റർനെറ്റ് ഉപയോഗത്തെ അടിസ്ഥാനമാക്കി ബെംഗളൂരുവിൽ പലയിടത്തും സൗജന്യമായി വൈഫൈ ഇന്റർനെറ്റ് സേവനം ലഭിക്കുന്നുണ്ട്. ഇത്തരത്തിൽ ഫ്രീ WiFi ലഭിക്കുന്ന ചില സ്ഥലങ്ങളെ നമുക്കൊന്നു അറിഞ്ഞിരിക്കാം.
1. ഓല കാബുകൾ : സ്വന്തമായി വാഹനങ്ങൾ ഇല്ലാത്തവർ ബെംഗളൂരുവിൽ ഓട്ടോറിക്ഷകളെക്കാൾ കൂടുതലായി ആശ്രയിക്കുന്നവയാണ് ഓൺലൈൻ ടാക്സി സർവീസായ ഓല കാബ്‌സ്. ഇപ്പോൾ ഓല കാബ്‌സിന്റെ എല്ലാ ടാക്സി കാറുകളിലും യാത്രക്കാർക്ക് ഫ്രീ വൈഫൈ സേവനം ബെംഗളൂരുവിൽ ലഭ്യമാണ്. ഇത് ലഭിക്കുന്നതിനായി ഓല അക്കൗണ്ടിൽ കയറേണ്ട ആവശ്യം പോലുമില്ലെന്നാണ് അനുഭവസ്ഥർ പറയുന്നത്. എന്തായാലും ഇനി അടുത്ത തവണ ഓല കാബ്‌സിൽ കയറുമ്പോൾ ഈ കാര്യം ഒന്നു നോക്കണേ.
2. ചിന്നസ്വാമി സ്റ്റേഡിയം : ഇന്ത്യയിലെ പ്രധാനപ്പെട്ട ക്രിക്കറ്റ് സ്റ്റേഡിയങ്ങളിലൊന്നാണ്‌ ബെംഗളൂരുവിലെ ചിന്നസ്വാമി സ്റ്റേഡിയം. കബ്ബൺ പാർക്കിനും, എം.ജി. റോഡിനും സമീപത്തായി സ്ഥിതി ചെയ്യുന്ന മുപ്പതു വർഷത്തിലധികം പഴക്കമുള്ള ഈ സ്റ്റേഡിയം ബാംഗ്ലൂറ് നഗരത്തിന്റെ ഹൃദയഭാഗത്തായാണ്‌ സ്ഥിതി ചെയ്യുന്നത്. ഈ സ്റ്റേഡിയത്തിൽ വരുന്നവർക്ക് വൈഫൈ വഴി സൗജന്യമായി ഇന്റർനെറ്റ് ഉപയോഗിക്കുവാൻ സാധിക്കും. ഇതിനായി യാതൊരുവിധ പാസ്സ് വേർഡുകളും ആവശ്യമില്ല.
3. കെഎസ്ആർടിസി ബസ് സ്റ്റേഷൻ : ബെംഗളൂരുവിലെ പൊതുമേഖല ഗതാഗത രംഗത്ത് മുഖ്യ പങ്ക് വഹിക്കുന്നത് കെഎസ്ആർടിസി(കർണാടക)യും, ബിഎംടിസിയും ആണ്. ബെംഗളൂരുവിലുള്ള പ്രധാന ബസ് സ്റ്റേഷനുകൾ എല്ലാം തന്നെ ഇന്ന് യാത്രക്കാർക്ക് ഫ്രീ വൈഫൈ പ്രദാനം ചെയ്യുന്നുണ്ട്. ഒരു നിശ്ചിത സമയത്തേക്ക് മാത്രമായിരിക്കും ഈ സേവനം ഒരു വ്യക്തിയ്ക്ക് (Device നു) ലഭിക്കുക. ബസ് സ്റ്റേഷനിൽ എത്തുന്നവർക്ക് സമയം പോകുവാനും പ്രധാനപ്പെട്ട കാര്യങ്ങൾ ചെയ്യുവാനും ഒക്കെ ഈ സേവനം ഉപകാരപ്പെടാറുണ്ട്.
4. Troit Brewpub : ഇത് ബെംഗളൂരുവിലെ ഒരു പ്രധാനപ്പെട്ട ബിയർ പബ്ബാണ്. ബിയറിന് പുറമെ ഇവിടെ വെറൈറ്റി സ്‌നാക്‌സും സലാഡുകളും ഒക്കെ ലഭിക്കും. ഇതുകൊണ്ടു തന്നെ സ്വദേശികളും വിദേശികളുമടക്കം ധാരാളം ആളുകളാണ് ഇവിടെ സന്ദർശകരായി എത്തുന്നത്. ഇവിടത്തെ കസ്റ്റമേഴ്‌സിന് ഫ്രീ വൈഫൈയും അവർ പ്രദാനം ചെയ്യുന്നുണ്ട്. “wine&cheese” എന്ന പാസ്സ് വേർഡ് കൊടുത്താൽ മാത്രമേ ഇന്റർനെറ്റ് ഉപയോഗിക്കുവാൻ സാധിക്കുകയുള്ളൂ. ഈ പാസ്സ് വേർഡ് ചിലപ്പോൾ മാറ്റങ്ങൾ സംഭവിച്ചേക്കാം.
5. ദി ഹമ്മിങ് ട്രീ : ബെംഗളൂരുവിലെ ഇന്ദിരാനഗറിൽ സ്ഥിതി ചെയ്യുന്ന ഒരു സംഗീതവേദിയും ബാറും കൂടിയാണ് ഇത്. ഇവിടെ വരുന്നവർക്ക് ലൈവ് മ്യൂസിക് ആസ്വദിക്കുവാൻ സാധിക്കും. കൂടാതെ എക്സിബിഷനുകൾ, സാംസ്കാരിക പരിപാടികൾ, വർക്ക്ഷോപ്പുകൾ മുതലായവ ഇവിടെ നടത്തപ്പെടാറുണ്ട്. ഇവിടെ വരുന്ന സന്ദർശകർക്ക് ഇവർ ഫ്രീ വൈഫൈ സേവനങ്ങളും നൽകുന്നുണ്ട്.
6. യോഗിസ്ഥാൻ : ബെംഗളൂരുവിലെ പ്രശസ്തമായ ഒരു കഫറ്റേരിയ ആണ് യോഗിസ്ഥാൻ. ഇവിടെ എല്ലാത്തരം സ്‌നാക്‌സും കൂൾ & ഹോട്ട് പാനീയങ്ങളും ലഭിക്കും. സന്ദർശകർക്ക് ഫ്രീ വൈഫൈ ലഭിക്കുന്നതിനാൽ ഇവിടെ വരുന്നവരിൽ ഭൂരിഭാഗവും ഒരു സ്‌നാക്‌സും കഴിച്ചു നെറ്റ് ഉപയോഗിക്കുവാൻ വേണ്ടിയാണ്. ഇന്റർനെറ്റ് ഉപയോഗിക്കുവാൻ ഇവിടെ യാതൊരുവിധ പാസ്സ് വേർഡുകളും ആവശ്യമില്ല.
7. ബെംഗളൂരു ഇന്റർനാഷണൽ എയർപോർട്ട് : ബെംഗളൂരു നഗരത്തിൽ നിന്നും കുറച്ചു മാറിയാണ് കെമ്പഗൗഡ ഇന്റർനാഷണൽ എയർപോർട്ട് സ്ഥിതി ചെയ്യുന്നത്. വളരെ തിരക്കേറിയ ഒരു എയർപോർട്ട് കൂടിയാണിത്. എയർപോർട്ടിൽ ഏതൊരാൾക്കും ഫ്രീ വൈഫൈ സേവനം ലഭ്യമാണ്. ഒരു നിശ്ചിത സമയം മാത്രമേ ഈ സേവനം ഉപയോഗിക്കുവാൻ സാധിക്കുകയുള്ളൂ. എയർപോർട്ടിൽ വിമാനങ്ങൾക്കായി കാത്തു നിൽക്കുന്നവർക്ക് വളരെ ഉപകാരപ്രദമാണ് ഈ സേവനം.
8. സ്റ്റാർ ബക്ക്സ് : ബെംഗളൂരുവിലെ ഒരു പ്രധാനപ്പെട്ട കോഫീ ഷോപ്പാണ് സ്റ്റാർ ബക്സ്. വിവിധ തരത്തിലുള്ള ഹോട്ട് & കോൾഡ് പാനീയങ്ങളും സ്‌നാക്‌സും ഒക്കെ ഇവിടെ ലഭ്യമാണ്. ഇവിടെ വരുന്ന സന്ദർശകർക്ക് സ്റ്റാർ ബക്ക്സ് ജീവനക്കാരുടെ സഹായത്തോടെ ഫ്രീ വൈഫൈ ഉപയോഗിക്കുവാൻ സാധിക്കും.
ബെംഗളൂരു പോലുള്ള വലിയ നഗരത്തിലെ പ്രധാനപ്പെട്ട ഫ്രീ വൈഫൈ ഏരിയകൾ മാത്രമാണ് ഈ ലേഖനത്തിൽ പറഞ്ഞിരിക്കുന്നത്. ഇവ കൂടാതെ ധാരാളം ഫ്രീ വൈഫൈ സ്പോട്ടുകൾ ബെംഗളൂരു നഗരത്തിലുണ്ട്. അതുപോലെ തന്നെ എന്തെങ്കിലും സാങ്കേതിക കാരണങ്ങൾ കൊണ്ടോ മറ്റോ ഇത്തരം സേവനങ്ങൾക്ക് ചില സമയങ്ങളിൽ തടസ്സം നേരിട്ടേക്കാം. എന്തായാലും അടുത്ത തവണ ഈ പറഞ്ഞിരിക്കുന്ന ഏതെങ്കിലും സ്ഥലങ്ങളിൽ പോകുമ്പോൾ ഫ്രീ വൈഫൈ കിട്ടുന്നുണ്ടോ എന്നു നോക്കുക. മറ്റൊരു കാര്യം പ്രധാനമായി ശ്രദ്ധിക്കേണ്ടത് എന്തെന്നാൽ അംഗീകൃതമായ വൈഫൈ സൗകര്യങ്ങൾ മാത്രം ഉപയോഗിക്കുക. ചിലർ ഇതുവഴി ഹാക്കിങ് പോലുള്ള Illegal activities നടത്തുന്നതായി ശ്രദ്ധയിൽപ്പെട്ടിട്ടുണ്ട്.
Tech Travel Eat
Sujith Bhakthan
